موقع الشاعر مشير السعيدي

موقع الشاعر مشير السعيدي

شعر شعبي

التبادل الاعلاني

السلام عليكم على بركة الله افتتح منتدانا المتواضع هذانرجو ابداء ارائكم الكريمه لانها تهمنا كثيراالشاعرمشير السعيدي

    كاس الحب

    شاطر

    كاس الحب

    مُساهمة من طرف المشرف العام مشير السعيدي في الأربعاء أغسطس 04, 2010 9:09 am

    كاس الحب
    ـــــــــــــــــ
    دِخيلَه إلروح عِدَك ليش تِضهدها
    ليك الظيم لَچها إوبغَت تِسنِدهــا
    ــــــــــــــــــ
    لَچها إلظيم مِنَك ليك إجت تِشكيــــك
    إسويده إتصيب روحي إنسِمعَت إبطاريك
    حار إلصَبر بيه إبچيها لو أبچيــــك
    أشِل بيها إبخِناجِر تِرِد تِسرِدهــــا
    ـــــــــــــــــ
    أشِل بيها وأخيط من دَمِع عيناي
    سِلِت يادِواها إعليك وانت الداي
    يِدفه إليَمي يِگعِد مِن زِفير إحشاي
    روحي إطوير شَلوَه إشبِدَه إوتِمرِدها
    ـــــــــــــــــــ
    تِمرِدها إوتِوَرج إلشامت إعليها
    إوتِدري إجفاك جَمرَة غَضَه إتچويها
    صبَخ صَيهَد حَرِثها إبريعَك إسگيها
    تِثمِر طيب روحي إووِفَه إن تِحصِدها
    ــــــــــــــــــــ
    إحصِدها إوضوگ طَعم إلطيب إلبروحي
    إوكاسِرها إوي روحك وإدمِل إجروحي
    حتى إلدوح كاسَر نوحَه وي نوحي
    ناصَبها إعلى وني إلدوح حاسِدها
    ــــــــــــــــــ
    حاسِدها إويريد إيون مِثِل وني
    ماكَشَر يِعَرفَه إلدوح إبد سِني
    غِدَر بيه زِماني إوبيك وَهدَني
    روحي إعليك تِطلَگ تَدنَه وَلِدها
    ـــــــــــــــــــــــ
    تِطلَگ بيك روحي إمعَسرَه چَن بثنين
    تِهوي إعليك تِگلَگ ياصبي إلعين
    چَل مديون وإلدَيان يَبغي إلدين
    تاره إيجر حَسِرتَه إوتاره يِنهِدها
    ــــــــــــــــــــــ
    يِنهِدها حَسِرتَه إوراح يِصفِج راح
    إوگض مِگوار وَكتَه إوصار بيه نَداح
    تِف إشلون عيشَه إولا دَقيقَه أرتاح
    غيمَة گيض بَس رَبَك يِرَعِدها
    ـــــــــــــــــــــــــــ
    غيمَة گيض وإشتاها مَحَل صيهود
    إوبيها أزرَه سَندها إوصاح يافرهود
    إبسِن شِمات خِرگَه إوسَرِدوها إسرود
    إوبيها إنوب أهلها إنوجَر موگَدها
    ــــــــــــــــــــــــــ
    موگَدها إنوجَر والناس مَلسَه إلسان
    عِلِچ بَستي صفَة وإتلوچ بي غُمان
    وآنا إبكاس حُبَك ياتَرِف سَكران
    وإذا أصحَه دقيقه إعليك أناشِدها
    ــــــــــــــــــــــــ
    أناشِدها عليك إتگول بِعيونَك
    حبيبَك نام دَثَرتَه إبسِفَه إجفونَك
    كِع إركِد إوبَطِل بالوفَه إظنونَك
    إوروحَك لليوافي إالطيب عَوِدها
    ـــــــــــــــــــــ
    عَوِدها توافي إلي يِوافيها
    إبحب إلناس روحَك دوم غذيها
    خَل إلصِدِگ سِچَه إتنال تاليها
    يِخرَس لِلصِدوگ إلسان ناگِدها
    ـــــــــــــــــــ
    ناگِدها إيتَلَعثَم وإلصِدوگ إيفوز
    وإجويريد يِخنِب لو وِضَح تَموز
    إوحِب إبراي وَجدَك وإلعَگُل بيه روز
    إيصَلِع لِلعَيان إويِبرِز أسوَدها
    ـــــــــــــــــــــــ

    مشير السعيدي


    _________________
    انه الماصَر ضميره أوعَلـَگ الوجدان
    صَر اهموم رَبعَه ابزحمة اكواره

      الوقت/التاريخ الآن هو الخميس أبريل 26, 2018 3:16 pm